हरेक बर्ष झै धान बालीमा मल अभावको सामना गर्दै आएका बाराका किसानले यो बर्ष पनि फेरी उस्तै समस्या छ ।
धान खेतीमा युरिया मल नपाएको गुनासो किसानहरुले गरेका छन् । रासायनिक मल बिक्री गर्ने डिलर तथा सहकारीहरूमा युरिया मल छैन ।
केही सहकारीमा डिएपी मात्रै पाइने गरेको किसानहरू बताउँछन् । धानमा मल छर्ने बेला भइसक्दा पनि बजारमा युरिया नपाइएको बाराका अधिकांश पालिकाको किसानहरुको गुनासो छ ।
करैयामाई गाउँपालिका वडा नम्बर ५ का किसान रामलाल चौधरीको पनि गुनासो उस्तै छ । तर कम्पनीको गोदाममा यती बेला डिएपी मात्रै थुप्रिएको छ ।कृषि ज्ञान केन्द्र बाराका अनुसार बाली र सिजनअनुसार बारा जिल्लालाई वार्षिक ६१ हजार मेट्रिक टनभन्दा बढी डिएपी,युरिया र पोटास मलको आवश्यक छ ।
तर वार्षिक रुपमा करिब २८ प्रतिशत मात्रै आयात हुँदै आएको ज्ञान केन्द्र प्रमुख राजनारायण साहले जानकारी दिनुभयो । जिल्लामा हिउँदे र वर्षे गरी दुई सिजनमा ६२ हजार २० हेक्टर जमिनमा धान खेती हुने गरेको छ । यस बालीका लागि मात्रै १५ हजार ६६ मेट्रिक टन युरिया,५ हजार ३९१ मेट्रिक टन डिएपी र ४ हजार ९२ मेट्रिक टन पोटास आवश्यक पर्ने गरेको ज्ञान केन्द्र प्रमुख साहले बताए ।
आयातसँगै वितरण कार्यमा पनि व्यवस्थापन गर्नसके किसानलाई केही राहत पुर्याउन सकिने उहाँको भनाई छ । सरकारी अनुदानका मल पाउन नसकेपछि बाराका किसानहरु भारतीय मलको भरमा परेका छन ।
भारतबाट तस्करीबाट आउने युरिया मल किनेर भनेपनि आफ्नो काम चलाईरहेको कोल्हवी नगरपालिका वडा नम्बर ८ का एक किसानले बताए । जिल्लाको सिमावर्ति क्षेत्रका अधिकांश किसानहरु भारतीय मलकै भरमा खेती गरिहेका छन ।
नेपाली मल पाउदैनौ,भारतीय मल ल्याउदा प्रहरी प्रशासनको डर छ,महागढीमाई नगरपालिका स्थित बरियारपुरका एक किसानले गुनासो सुनाए ।
