रडले छेडेर बाराको अम्लेखगंजमा मृत्यु भएका विद्यार्थी बालक लक्की गोलेको परिवारले क्षतिपूर्ति वापत रु.१० लाख रकम पाउने भएका छन् ।
नेपाल आयल निगमको अमलेखगञ्जस्थित प्रादेशिक कार्यालयमा विहीवार भएको छलफलमा पीडित परिवारलाई क्षतिपूर्ति उपलब्ध गराउने सहमती भएको हो ।
क्षतिपूर्ति रकमसंगै लक्कीका अभिभावक मध्ये एक जनालाई आयल निगममा रोजगारी र काजक्रिया खर्चवापत २५ हजार रकम उपलब्ध गराउने सहमती भएको जीतपुरसिमरा उपमहानगरपालिका २१ का वडाध्यक्ष सुवास श्रेष्ठले जानकारी दिएका छन ।
अमलेखगञ्जस्थित नेपाल आयल निगमको प्रादेशिक कार्यालयले विद्युतिकरणका लागि भन्दै सडकको पेटीमा गाडेको पोलको रडमा छेडिएर स्थानीय ललित गोलेका ११ वर्षीय छोरा लक्कीको घटनास्थलमै ज्यान गएको थियो ।
घरबाट विद्यालयका लागि निस्किएका लक्कीको टाउको निगमको कार्यालय अगाडी पोलमा भ¥याङ बनाउन राखिएको रडमा छेडिएको थियो ।
बालक गोले बुधवार विहान विद्यालयको पोशाक लगाएर आयल निगम अगाडी रहेको पार्किङस्थलतर्फ जादै थिए । पार्किङ स्थलबाट विद्यालयका लागि बस चढ्न जाने बेला सडक पेटीमा राखिएको पोलको रडमा छेडिएर मृत्यु भएको थियो ।
बालक लक्की जीतपुरसिमरा उपमहानगरपालिका वडा नं.१ पथलैयास्थित होली गार्डेन इङ्लिस स्कुलमा कक्षा ५ मा अध्ययनरत थिए ।
