प्रभु साह नेतृत्वको जनता पार्टी (आजपा)ले मधेसका सामुदायिक विद्यालयमा सरकारले गरिरहेको विभेद अन्त्यको माग गर्दै बाराको कलैयामा आज आइतबार प्रर्दशन गरेको छ ।
पार्टीले मधेसका जिल्लाका सामुदायिक विद्यालयमा विद्यार्थी संख्याको अनुपतमा शिक्षकको दरबन्दी कायम गर्न माग गर्दै आन्दोलन गरेको हो । पार्टीले बारा,पर्सा सहित मधेश सवै जिल्लाहरुमा प्रर्दशन र ज्ञापनपत्र बुझाएको छ ।
मधेसको शिक्षा धराशायी हुदै गएको,पहाड र मधेसको तुलना गर्दा मधेसका सामुदायिक विद्यालयमा विद्यार्थी संख्याको अनुपातमा शिक्षक दरबन्दी र पदपूर्ती असमान रहेको भन्दै आजपाले प्रर्दशन गरेको पार्टीले जनाएको छ ।
आम जनता पार्टीका नेता–कार्यकर्ताले आज आइतबार बाराको कलैयामा प्रदर्शन गर्दै बाराका प्रमुख जिल्ला अधिकारीमार्फत संघ र प्रदेश सरकारलाई ज्ञापनपत्र बुझाएको केन्द्रीय सचिव एवं मधेस प्रदेश अध्यक्ष उमेश कुशवाहाले जानकारी दिएका छन ।
पार्टीका केन्द्रीय उपाध्यक्ष अशोक लामा,केन्द्रीय महासचिव त्रिभुवन साह,केन्द्रीय सचिव एंव मधेस प्रदेश अध्यक्ष कुशवाहा,विद्यार्थी मोर्चाका केन्द्रीय अध्यक्ष विवेक साह,आम जनसांस्कृतिक मोर्चाका केन्द्रीय अध्यक्ष विजय यादव लगायतको सहभागितामा ज्ञापनपत्र बुझाईएको हो ।
ज्ञापनपत्रमा शिक्षा ऐन विपरीत गरिएको शिक्षक दरबन्दीको असमान वितरण खारेज गर्नुपर्ने,विद्यार्थी संख्याको अनुपातमा तहगत र विषयगत शिक्षकको दरबन्दी कायम गरी पदपूर्ती गर्नुपर्ने लगायतका मागहरु उल्लेख गरिएको छ ।
पार्टीले शिक्षा सम्बन्धी विभिन्न माग राख्दै यही बैशाख २५ देखि ३० गतेसम्म मधेसका हरेक जिल्लामा संघर्ष समिति गठन गर्ने,बैशाख ३० गते विद्यार्थी र अभिभावकसंग अन्तरकृया गर्ने,जेठ १५ गते शिक्षा समन्वय ईकाई समितिको कार्यालय घेराउ गर्ने र जेठ २० गते शिक्षा विभाग घेराउ गर्ने लगायतका कार्यक्रम समेत भएको केन्द्रीय उपाध्यक्ष लामाले साझेदारी दैनिकलाई बताएका छन ।
