जीतपुर । जीतपुरसिमरा उपमहानगरपालिका–९ छातापिप्रा वडा कार्यालयले समुदायका ज्येष्ठ नागरिक तथा एकल महिलालाई लक्षित गर्दै सम्मान तथा सहयोग कार्यक्रम सञ्चालन गरेको छ। चालु आर्थिक वर्षको स्वीकृत वडास्तरीय कार्यक्रमअन्तर्गत बिहीबार आयोजित कार्यक्रममा लाभग्राहीहरूलाई झुल र छाता वितरण गरिएको हो।
वडा कार्यालय परिसरमा सम्पन्न कार्यक्रममा सहभागी ज्येष्ठ नागरिक र एकल महिलालाई सम्मानस्वरूप दैनिक जीवनमा उपयोगी सामग्री प्रदान गरिएको थियो। वडा अध्यक्ष मोतिलाल राउतले मौसमीय प्रतिकूलता तथा स्वास्थ्य जोखिमलाई ध्यानमा राखेर कार्यक्रम सञ्चालन गरिएको जानकारी दिनुभयो।
उहाँका अनुसार अत्यधिक गर्मी, वर्षायामको आगमन र लामखुट्टेको बढ्दो प्रभावबाट जोगिन सहयोग पुग्ने उद्देश्यले झुल तथा छाता वितरण गरिएको हो। स्थानीय सरकार नागरिकको जीवनसँग प्रत्यक्ष जोडिएको निकाय भएकाले उनीहरूको आवश्यकता सम्बोधन गर्नु आफ्नो दायित्व रहेको उहाँले बताउनुभयो।
वडा अध्यक्ष राउतले समाज निर्माणमा ज्येष्ठ नागरिकको अनुभव र योगदान महत्वपूर्ण हुने उल्लेख गर्दै एकल महिलाहरूको सामाजिक सम्मान र सुरक्षामा समेत वडा कार्यालय संवेदनशील रहेको धारणा व्यक्त गर्नुभयो। आगामी दिनमा पनि लक्षित वर्गको जीवनस्तर सुधार गर्ने कार्यक्रमलाई निरन्तरता दिइने उहाँको भनाइ थियो।
कार्यक्रममा बोल्दै वडा सचिव सिद्धार्थ चौधरीले स्थानीय तहले समुदायका विभिन्न वर्गका नागरिकको आवश्यकता पहिचान गरी सोहीअनुसार कार्यक्रम सञ्चालन गरिरहेको बताउनुभयो। उहाँले यस्ता गतिविधिले नागरिकमा अपनत्वको भावना बढाउनुका साथै स्थानीय सरकारप्रतिको विश्वास अझ सुदृढ बनाउने विश्वास व्यक्त गर्नुभयो।
सामग्री प्राप्त गरेपछि लाभग्राहीहरूले वडा कार्यालयप्रति आभार व्यक्त गरेका थिए। उनीहरूले प्राप्त झुल र छाता दैनिक जीवनमा उपयोगी हुने बताउँदै यस्ता जनमुखी कार्यक्रमलाई आगामी वर्षहरूमा समेत निरन्तरता दिन आग्रह गरेका छन्।
कार्यक्रममा जनप्रतिनिधि, वडा कर्मचारी, स्थानीय समाजसेवी, अगुवा तथा लाभग्राहीहरूको सहभागिता रहेको थियो। वडा कार्यालयले आगामी दिनमा ज्येष्ठ नागरिक, एकल महिला तथा अन्य लक्षित समुदायको सामाजिक संरक्षण र जीवनस्तर अभिवृद्धिका लागि थप कार्यक्रम सञ्चालन गर्ने जनाएको छ।
