नेशनल मेडिकल कलेजको ल्याबमा म्याद नाघेका केमिकल फेला परेपछि पक्राउ परेर छुटेका कलेजका ल्याब ईन्चार्ज सञ्जय साहलाई बयानका लागि पर्सा प्रहरीले बोलाएको छ ।
गत चैत २६ गते अनुगमनको क्रममा म्याद गुज्रिएको केमिकल कलेजको ल्याबमा भेटिएको थियो । त्यसपछि प्रहरीले कलेजका एमडि शहनवाज अन्सारी र ल्याब ईन्चार्ज साहलाई पक्राउ गरेको थियो ।
पक्राउ परेका दुबैजना बिरुद्ध प्रहरीले कालोबजारी तथा केही अन्य सामाजिक अपराध ऐन अन्र्तगत मुद्दा दायर गरेको थियो ।
कालोबजारी मुद्दा चलिरहेकोले साहलाई बयानका लागि बोलाइएको पर्साका प्रहरी प्रबक्ता डिएसपी कुमार बिक्रम थापाले साझेदारी दैनिकलाई जानकारी दिए ।
तीन चार दिन अघि बयानका लागि बोलाइएको भएपनि नेशनल मेडिकल कलेजमै भर्ना भएकोले उनी डिस्चार्ज भएपछि बयानको लागि आउने थापाले बताए ।
पक्राउ परेका दुबैजनालाई कालोबजारी मुद्दामा अदालतले पाँच दिनको म्याद थप गरेको थियो ।प्रहरीले हाजिरी जमानीमा दुबैजनालाई गत चैत २८ गते राति छाडेको थियो ।
मुद्दा चलि नै रहेको तथा सरकारी वकिलको कार्यालयले प्रहरी हिरासत बाहिर राखेर अनुसन्धान गर्न भनेकोले दुबैजनालाई बयानको लागि प्रहरीले बोलाएको बेला आउनुपर्ने डिएसपी थापाको भनाई छ ।
गत चैत २६ गते वीरगञ्ज महानगर,प्रहरी लगायतका सरोकारवाला निकायको अनुगमन टोलीले कलेजको ल्याबमा अनुगमन गर्दा म्याद गुज्रिएको केमिकल भेटिएको थियो ।कलेजका एमडि र ल्याब ईन्चार्जलाई प्रहरीले पक्राउ गरेको थियो ।
यसपछि कलेजका कर्मचारी र स्वास्थ्यकर्मीहरुले त्यसको भोलि पल्ट जिल्ला प्रहरी कार्यालय अगाडि बिरोध प्रदर्शन पनि गरेका थिए ।
