बारा कलैयाका रामराजा बहुमुखी क्याम्पस प्रमुख हरिभूषण कुशवाहाको हत्या प्रकरणमा संलग्न दोषीलाई कारबाहीको माग गर्दै आफन्तजन तथा शुभेच्छुकहरुले कलैयामा प्रदर्शन गरेका छन् ।
आफन्त तथा समर्थकहरुले हत्यामा संलग्न रहेको आरोपितलाई कानुनी दायरामा ल्याउन माग गर्दै बीच बाटोमा शव राखेर प्रदर्शन गरेका हुन् ।
जिल्ला प्रहरी कार्यालय र जिल्ला प्रशासन कार्यालय बारा अगाडीको बीच बाटोमा मृतक कुशवाहाको शव राखेर प्रदर्शन गरिएको हो ।
शैक्षिक संघ संगठन एवम समर्थकहरुले मृतक कुश्वाहाको दोषीलाइ कारबाहीको माग गर्दै २ बजेदेखि प्रदर्शनमा सुरु गरेको एन प्याब्सन बाराले जनाएको छ ।
एन प्याब्सन बाराका अध्यक्ष प्रभुलाल कुश्वाहाले रामराजा क्याम्पस प्रमुखको हत्यारालाई चाँडै कानुनी दायरामा ल्याउनका लागि शव राखेर प्रदर्शन सुरु गरिएको जानकारी दिए ।
यसैवीच शिक्षा क्षेत्रका संघसंगठनहरुले विज्ञप्ती जारी गर्दै घटनाको घोर भत्सना गर्दै दोषीलाई तत्काल पक्राउ गरी कडा भन्दा कडा कारवाही गर्न माग समेत गरेका छन ।
शुक्रबार साँझ अज्ञात समूहले प्रहार गरेको गोलीबाट क्याम्पस प्रमुख कुश्वाहाको उपचारको क्रममा मृत्यु भएको हो ।
गाउँमा रहेको आफ्नै पोखरीको माछा मारेर कलैयातर्फ फर्किने क्रममा आदर्श कोतवाल गाउँपालिका वडा नम्बर ३ बतरामा उनीमाथि गोली प्रहार भएको थियो ।
