कलैया । उपभोक्ताले सुरक्षित र गुणस्तरीय खाद्य सामग्री उपभोग गर्न पाउने अधिकार सुनिश्चित गर्ने उद्देश्यले बारा जिल्लाका विभिन्न बजार क्षेत्रमा सञ्चालनमा रहेका होटल, क्यान्टिन, रेष्टुरेन्ट तथा मिठाई पसलहरूको अनुगमन गरिएको छ।
खाद्य प्रविधि तथा गुण नियन्त्रण कार्यालयको अगुवाइमा सम्पन्न अनुगमन निजगढ, कलैया र प्रसौनी क्षेत्रमा केन्द्रित थियो। सम्बन्धित निकायका प्रतिनिधि सहभागी संयुक्त टोलीले खाद्य व्यवसाय सञ्चालनको अवस्था, सरसफाइ, खाद्य पदार्थको भण्डारण तथा गुणस्तरका विषयमा स्थलगत निरीक्षण गरेको हो।
कार्यालय प्रमुख सुरेश कुमार सिंहका अनुसार व्यवसायीलाई भान्सा तथा पसल परिसर सधैं सफा राख्न, खाद्य सामग्रीलाई धुलो, धुवाँ र किराफट्याङ्ग्राको सम्पर्कबाट जोगाउन तथा अखाद्य वा प्रतिबन्धित रङको प्रयोग नगर्न निर्देशन दिइएको छ।
साथै, खाना पकाउन प्रयोग हुने तेलको गुणस्तरमा विशेष ध्यान दिन, एकपटकभन्दा बढी पटक प्रयोग गरिएको तेल पुनः प्रयोग नगर्न र म्याद नाघेका खाद्य सामग्री बिक्री नगर्न सचेत गराइएको उनले बताए।
अनुगमनका क्रममा खाद्य सामग्री उचित तापक्रममा भण्डारण गर्ने व्यवस्था मिलाउन र उपभोक्तासम्म सुरक्षित तथा गुणस्तरीय खाद्य वस्तु पुर्याउन व्यवसायीलाई आग्रह गरिएको छ।
निरीक्षणका बेला खाद्य स्वच्छतासम्बन्धी आवश्यक मापदण्ड पूरा नगरेको एक व्यवसायिक प्रतिष्ठानमा कैफियत भेटिएपछि प्रचलित कानुनअनुसार १० हजार रुपैयाँ जरिवाना गरिएको कार्यालयले जनाएको छ।
खाद्य प्रविधि तथा गुण नियन्त्रण कार्यालयले उपभोक्ताको स्वास्थ्यसँग प्रत्यक्ष जोडिएका विषयमा कुनै पनि प्रकारको लापरवाही स्वीकार्य नहुने स्पष्ट गर्दै आगामी दिनमा पनि यस्ता अनुगमनलाई नियमित रूपमा निरन्तरता दिइने जनाएको छ।
साथै, सबै खाद्य व्यवसायीलाई स्वच्छता मापदण्डको पूर्ण पालना गर्न र उपभोक्तालाई पनि खाद्य सामग्री खरिद गर्दा गुणस्तर तथा म्यादबारे सचेत रहन आग्रह गरिएको छ।
