बारा प्रहरीले एक करोड तीन लाख ९७ हजार बराबरको अवैध सामान सहित ट्रकलाई नियन्त्रणमा लिएको छ ।
जिल्ला प्रहरी कार्यालय बाराका मातहत तथा प्रहरी ईकाइ कार्यालयहरूबाट खटिएका प्रहरी टोलिहरूले जिल्लाको विभिन्न स्थानमा गाडिहरूलाई रोकी जाँच गर्ने क्रममा अवैध सामान सहित ट्रकलाई नियन्त्रणमा लिएको हो ।
उक्त ट्रकमा बिल भरपाई भन्दा बढी सामानको स्रोत खुलाउन नसकेको अन्दाजी एक करोड तीन लाख ९७ हजार पाँच सय ७१ रूपैयाँ बराबरको अवैध सामान रहेको प्रहरीले जनाएको छ ।
ईलाका प्रहरी कार्यालय जीतपुरबाट खटिएको प्रहरीले जिल्लाको जीतपुरसिमरा उप–महानगरपालिका वडा नम्बर ७ जीतपुर स्थित बीरगंजबाट कास्की तर्फ जाँदै गरेको ना ३ ख ३७४ को ट्रकमा लोड रहेको अन्दाजी २६ लाख ६४ हजार तीन सय ६१ बराबरको सामान बरामद गरेको छ ।
त्यस्तै प्रहरीले बीरगंजबाट बाँके तर्फ जाँदै गरेको बा.प्र ०३–००१ ख २८३८ नम्बरको ट्रकमा लोड रहेको अन्दाजी ६१ लाख ६८ हजार एक सय १९ रुपैयाँ बराबरको खुद्रा सामानको बरामद गरेको हो ।
त्यसैगरी प्रहरी चौकी पथलैयाबाट खटिएको प्रहरी टोलिले जीतपुरसिमरा उप–महानगरपालिका वडा नम्बर १ पथलैया चोकस्थित बीरगंजबाट कास्की तर्फ जाँदै गरेको ना ३ ख ७०५० नम्बरको ट्रकमा लोड रहेको अन्दाजी १५ लाख ६५ हजार ९१ रुपैयाँ बराबरको खुद्रा सामान बरामद गरेको प्रहरीले जनाएको छ ।
जिल्ला प्रहरी कार्यालय बाराका निमित्त सूचना अधिकारी एवम् प्रहरी निरीक्षक वीरेन्द्रराज गुरुङले शनिबार एक प्रेस विज्ञप्ति जारी गर्दै यसबारे जानकारी दिएका हुन् ।
