Sajhedari Daily
Latest News from Nepal

तालिबानको भिषण आक्रमण, १६ सुरक्षाकर्मी मारिए

Top Aside Banner

अफगानिस्तानका विद्रोही समूह तालिबानका लडाकूले गरेको पछिल्लो आक्रमणमा कम्तीमा १६ जना सुरक्षाकर्मी मारिएका छन् । स्रोतहरुका अनुसार आक्रमणबाट १० जनाभन्दा बढी सुरक्षाकर्मी घाइते भएका छन् ।

बाघलान प्रान्तको गोजारगाह–ए–नूर जिल्लाको एक सुरक्षा जाँच चौकीमा तालिबानले आक्रमण गरेको अफगान रक्षा मन्त्रालयले जनाएको छ । मन्त्रालयका अनुसार नजिकै रहेको प्रान्तीय प्रहरी मुख्यालय नजिक पनि भिडन्त भइरहेको छ ।

तालिबान तर्फ के कति क्षति भयो भन्ने खबर प्राप्त भइसकेको छैन । अफगान सेना र प्रहरीका लागि अमेरिकी सैनिकले समेत बन्दोबस्तीको प्रबन्ध गरिरहेको अफगानिस्तानस्थित अमेरिकी सैनिक कमान्डले जनाएको छ ।

उक्त हमलाका बारेमा थप विवरण आउन बाँकी रहेको छ । अफगान सरकार र तालिबानबीच कतारको दोहामा प्रत्यक्ष वार्ता जारी रहे पनि अफगानिस्तानभित्र हिंसात्मक झडपहरु नियमित रुपमा भइरहेका छन् । तालिबान र अमेरिकाबीच शान्ति स्थापनार्थ एक सम्झौतामा हस्ताक्षर भए पनि दिगो शान्ति स्थापनामा अझै जटिलताहरु रहेका छन् ।

यसैबीच, दुई वटा अफगान सैनिक हेलिकप्टर हेल्मान्ड प्रान्तमा जुधेर भएको दुर्घटनामा ९ जना सैनिकको मृत्यु भएको रक्षा मन्त्रालयले जनाएको छ ।

हेल्मान्ड प्रान्तका गभर्नरका प्रवक्ता ओमर ज्वाकले ती हेलिकप्टरबाट घाइते सैनिकको उद्धार कार्य भइरहेको जानकारी दिनुभयो ।

हेल्मान्ड प्रान्तका विभिन्न स्थानमा तालिबान समूहले गरेको आक्रामक कारबाहीबाट बच्न हजारौं मानिस आआफ्ना घर छाडेर अन्यत्र पलायन भएका छन् ।