जीतपुर । जीतपुरमा उत्पादित श्री शिवशक्ति खाद्य उद्योग प्रा.लि.को ‘साजन शुद्ध तोरीको तेल’ खरिद गरेका एक होटल सञ्चालकले केही प्याकेटमा कालो लेदो जस्तो पदार्थ देखिएको गुनासो गरेका छन्। किराना पसलबाट एक कार्टुन तेल खरिद गरी होटलमा ल्याएपछि ५ सय मिलिलिटरका प्याकेटमा असामान्य पदार्थ देखिएको उनको भनाइ छ।
होटल सञ्चालकका अनुसार सुरुमा एउटा प्याकेटमा मात्र समस्या देखिएको हुनसक्ने अनुमान गरिएको थियो। तर, कार्टुनमा रहेका अन्य प्याकेटसमेत जाँच गर्दा अधिकांशमा उस्तै प्रकारको कालो लेदो जस्तो पदार्थ देखिएको उनले बताए।
तेलको प्याकेटभित्र असामान्य पदार्थ देखिएपछि आफूहरू थप चिन्तित बनेको होटल सञ्चालकको भनाइ छ। उनका अनुसार केही बोतलमा कालो पदार्थ तलतिर जमेको देखिएको थियो। खाद्य वस्तुसँग सम्बन्धित विषय भएकाले यसको वास्तविक अवस्था परीक्षणबाट स्पष्ट हुनुपर्ने उनले बताए।
उद्योगबाट उत्पादन भएको खाद्य तेल बजारमा पठाउनुअघि गुणस्तर परीक्षण र निगरानी प्रभावकारी हुनुपर्ने होटल सञ्चालकको माग छ। यद्यपि, तेलमा देखिएको पदार्थ के हो र कसरी देखा परेको हो भन्नेबारे श्री शिवशक्ति खाद्य उद्योग प्रा.लि.को आधिकारिक धारणा सार्वजनिक भएको छैन।
उत्पादन, प्रशोधन, भण्डारण वा प्याकेजिङका क्रममा समस्या भएको हो वा अन्य कुनै कारणले यस्तो अवस्था देखिएको हो भन्ने विषय परीक्षणपछि मात्रै यकिन हुने देखिन्छ।
खाद्य तेलको गुणस्तरबारे गुनासो सार्वजनिक भएपछि सम्बन्धित खाद्य प्रविधि तथा गुण नियन्त्रण निकायबाट नमुना संकलन गरी प्रयोगशाला परीक्षण गर्नुपर्ने आवश्यकता देखिएको छ। प्रयोगशाला परीक्षणको नतिजापछि मात्र तेलमा देखिएको पदार्थको प्रकृति र उक्त उत्पादन उपभोगका लागि सुरक्षित भए–नभएकोबारे निष्कर्षमा पुग्न सकिनेछ।
घटनाले बजारमा बिक्री भइरहेका खाद्य तेलको नियमित गुणस्तर अनुगमनसँगै उद्योगबाट बजारमा पठाउनुअघि गरिने परीक्षण तथा निगरानी प्रणालीको प्रभावकारितामाथि समेत चासो बढाएको छ।
