मधेश प्रदेशको एक मात्र महानगर पर्साको वीरगंजस्थित नारायणी अस्पतालमा प्रसूती पश्चात हेरचाह गर्न आवश्यक पर्ने कक्ष (पोस्ट नेटल केयर वार्ड) निर्माण हुने भएको छ ।
हाल रहेको कक्षमा सीमित संख्यामा बढ्दो चापका कारण प्रसूती भएका आमा र बच्चालाई राख्न सो कक्षको निर्माण हुने भएको हो । हाल रहेको कक्ष अपुग रहेकाले थप २५ जना सुत्केरी आमा र बच्चा राख्न मिल्ने गरी नयाँ कक्ष निर्माण गरिने भएको हो ।
पोस्ट नेटल केयर वार्डको निर्माणको जिम्मा वीरगंजमा रहेको कन्साई नेरोलेक पेन्ट जापान प्राइभेट लिमिटेडसंग रहेको छ ।वीरगंज महानगरपालिकाका प्रमुख राजेशमान सिंहको पहलमा सो जिम्मेवारी उक्त संस्थालाई दिइएको हो ।
कन्साई नेरोलेक पेन्टले ४० लाखको लागतमा अस्पतालमा पोस्ट नेटल केयर (पिएनसी) वार्ड निर्माण गर्ने सम्झौता गरेको नारायणी अस्पताल विकास समितिका अध्यक्ष धीरजकुमार गुप्ताले साझेदारी दैनिकलाई जानकारी दिए ।
पिएनसी वार्ड छिटो छरितो निर्माण सम्पन्न गर्न आइतबार एक कार्यक्रमकाबीच त्रिपक्षीय सम्झौता भएको हो । वीरगंज महानगरपालिका, कन्साई नेरोलेक पेन्ट र नारायणी अस्पतालबीच त्रिपक्षीय हस्ताक्षर समेत भएको छ ।
सम्झौतामा महानगरपालिकाका निमित्त प्रमुख प्रशासकीय अधिकृत अरविन्दलाल कर्ण,अस्पतालका मेडिकल सुपरिटेन्डेन्ट डा. चितरञ्जन साह र कन्साई नेरोलेक पेन्टका तर्फबाट मनोज मिश्राले हस्ताक्षर गरेका छन्।
अस्पतालको सेवा चुस्त र गुणस्तरीय बनाउन महानगरपालिकाले आइसीयु संचालनका लागि आवश्यक सहयोगका साथै अस्पतालको सरसफाई जिम्मा यस अघि नै लिएर काम गरिरहेको छ ।
अस्पताल विकास समितिका अध्यक्ष धिरज गुप्ताले अस्पतालमा रहेको विभिन्न समस्याहरु सबैको साथ र सहयोगबाट मात्रै समाधान हुने भएको जनाए । उनले सबैलाई निरन्तर सहयोग गर्न आग्रह गरे ।
