पर्सा स्थित नेपाल भारत सीमाको दशगजा क्षेत्रमा दुई जनाको गाडिएको अवस्थामा शव भेटिएको बारा जिल्लाका रहेको पुष्टि भएको छ ।
पर्सास्थित नेपाल भारत सीमाको दशगजा क्षेत्रमा गाडिएको अवस्थामा कलैया उपमहानगरपालिका–६ का ६० वर्षीय रामएकबाल पण्डित कुम्हार र अर्को शव बाराकै आदर्श कोतवाल गाउँपालिका–७ घर भई कलैयामा बस्दै आएका ४० वर्षीय सुरेश ठाकुर लोहारको रहेको हो ।
उनीहरुको शव गाडिएको अवस्थामा गत मँगलबार पर्साको जगरनाथपुर गाउँपालिका दशगजा नजिकै भेटिएको थियो ।दुबै जनाको शवलाई प्रहरीले खनेर निकालेको थियो ।
दुबै जनाको सो बेला पहिचान हुन नसकेपछि बिहीबार दुबै जनाको पहिचान खुलेको पर्साका प्रहरी प्रबक्ता डिएसपी दिपक भारतीले साझेदारी दैनिकलाई जानकारी दिए ।
पहिचान खुलेका दुबै जना बाराबाट सँगै पर्सा जिल्लामा गएको भनि खुलेको उनले बताए ।यद्यपि पोष्टमार्टम रिपोर्ट आई नसकेका कारण दुबै जनको मृत्युको यकिन कारण हालसम्म खुल्न नसकेको भारतीले बताए ।
घटनाको सम्बन्धमा पर्सा प्रहरीले थप अनुसन्धान गरिरहेको छ ।
