रौतहट । सशस्त्र प्रहरी बल नेपाल नम्बर ११ गण हेडक्वार्टर रौतहटले आफ्नो १९ औँ स्थापना दिवस आज विविध कार्यक्रमका साथ भव्य र हर्षोल्लासपूर्ण वातावरणमा मनाएको छ।
राजदेवी नगरपालिका–२ हजमिनिया स्थित गण मुख्यालय परिसरमा आयोजित विशेष समारोहमा सुरक्षा निकाय, स्थानीय प्रशासन तथा विभिन्न क्षेत्रका प्रतिनिधिहरूको उल्लेखनीय सहभागिता रहेको थियो। कार्यक्रममा सशस्त्र प्रहरी बल मधेश प्रदेशका प्रमुख तथा डीआईजी कृष्ण ढकाल प्रमुख अतिथिका रूपमा सहभागी भएका थिए।
कार्यक्रमको सुरुवात डीआईजी ढकालले केक काटेर गरेका थिए। त्यसपछि आयोजित औपचारिक सभामा बोल्दै उनले सशस्त्र प्रहरी बलले राष्ट्रको सुरक्षा, सीमा व्यवस्थापन, विपद् व्यवस्थापन तथा शान्ति स्थापनामा महत्वपूर्ण भूमिका निर्वाह गर्दै आएको उल्लेख गरे।
उनले संगठनका सम्पूर्ण सदस्यहरूलाई आफ्नो जिम्मेवारीप्रति थप प्रतिबद्ध, अनुशासित र इमान्दार बन्न आग्रह गर्दै आगामी दिनमा अझ प्रभावकारी रूपमा सेवा प्रवाह गर्न निर्देशन दिएका छन्।
डीआईजी ढकालले विशेषगरी खुला सीमाका कारण हुने चोरी, तस्करी, अवैध ओसारपसार, मानव बेचबिखन लगायतका अपराध नियन्त्रणमा सशस्त्र प्रहरीले अझ कडाइका साथ सक्रिय हुनुपर्ने आवश्यकता औँल्याए। उनले आधुनिक चुनौतीहरूलाई ध्यानमा राख्दै प्रविधिमैत्री सुरक्षा व्यवस्थापनमा जोड दिनुपर्ने समेत बताए।
कार्यक्रममा रौतहटका प्रमुख जिल्ला अधिकारी (सीडीओ) दिनेश सागर भुसालले स्थापना दिवसको अवसरमा सशस्त्र प्रहरी बललाई बधाई तथा शुभकामना व्यक्त गरे।
उनले सीमाको सुरक्षा सुदृढ बनाउनु सशस्त्र प्रहरीको प्रमुख दायित्व भएको उल्लेख गर्दै सीमा क्षेत्रमा हुने अवैध गतिविधि नियन्त्रण, राजस्व चुहावट रोकथाम तथा स्थानीय स्तरमा शान्ति सुरक्षाको अवस्था मजबुत बनाउन अझ प्रभावकारी रूपमा परिचालित हुनुपर्ने धारणा राखे। उनले स्थानीय प्रशासन र सुरक्षा निकायबीचको समन्वय सुदृढ हुँदा मात्र शान्ति सुरक्षा प्रभावकारी बन्ने बताउँदै सशस्त्र प्रहरी बलले खेलेको भूमिकाको प्रशंसा गरे।
कार्यक्रमका क्रममा विभिन्न खेलकुद, अनुशासन, कार्यसम्पादन तथा अन्य प्रतियोगितामा उत्कृष्ट प्रदर्शन गर्ने सशस्त्र प्रहरी कर्मचारीहरूलाई नगद पुरस्कार, प्रमाणपत्र तथा सम्मानपत्र प्रदान गरिएको थियो।डीआईजी ढकाल, सीडीओ भुसाल तथा अन्य सुरक्षा निकायका प्रमुखहरूले उत्कृष्ट कर्मचारीहरूलाई सम्मान गर्दै उनीहरूको कार्यप्रति प्रशंसा व्यक्त गरेका थिए।
समारोहमा रौतहटका सशस्त्र प्रहरी उपरीक्षक रामहरि अधिकारी, जिल्ला प्रहरी कार्यालय रौतहटका प्रहरी उपरीक्षक सीताराम रिजाल, नेपाली सेनाका प्रमुख सेनानी लगायत विभिन्न सुरक्षा निकायका प्रमुखहरूको उपस्थिति रहेको थियो।
साथै विभिन्न सरकारी कार्यालयका प्रमुख, स्थानीय तहका जनप्रतिनिधि, संघ संस्थाका प्रतिनिधि, सञ्चारकर्मी तथा सशस्त्र प्रहरी कर्मचारीहरूको उल्लेखनीय सहभागिता रहेको थियो। कार्यक्रममा संगठनको इतिहास, उपलब्धि तथा भावी योजनाबारे जानकारी गराउनुका साथै देशको सुरक्षा र सेवा प्रवाहमा सशस्त्र प्रहरी बलले पुर्याएको योगदानबारे चर्चा गरिएको थियो।
२०६४ सालमा स्थापना भएको सशस्त्र प्रहरी बल नेपालले हालसम्म सीमा सुरक्षा, दंगा नियन्त्रण, विपद् व्यवस्थापन, महत्वपूर्ण संरचनाको सुरक्षा तथा विभिन्न राष्ट्रिय जिम्मेवारीहरू निर्वाह गर्दै आएको छ। स्थापना दिवसले संगठनभित्र एकता, अनुशासन र पेशागत प्रतिबद्धतालाई थप सुदृढ बनाउने विश्वास व्यक्त गरिएको छ।
