पछिल्लो समय मानिसहरुमा विभिन्न नसर्ने रोग समुदाय स्तरमा बढ्दै गएपछि यसको न्युनिकरणका लागी जीतपुरसिमरा उपमहानगरपालिकाले स्क्रिनिङ स्वास्थ्य शिविर सञ्चालन गरेको छ ।
उपमहानगरपालिकाको वडा नम्बर २० मा भएको नसर्ने रोग सम्बन्धीको स्क्रिनिङ स्वास्थ्य शिविरमा मधुमेह,उच्च रक्तचाप र मिर्गौला सम्बन्धी रोगको शङ्का लागेका १ सय ७८ जनाले सेवा लिएका छन् ।
स्क्रिनिङ शिविर नयाँ बिरामी पत्ता लगाउने अभियान भएकाले निदान भइसकेका,औषधि खाइरहेका र पुराना बिरामीको शिविरमा स्वास्थ्य चेकजाँच गरिएको थिएन ।
मधुमेह,उच्चरक्तचाप र मिर्गौला रोगको शङ्का लागेका २५ वर्षमाथिका बिरामीले मात्रै शिविरमा लाभ लिएको जनस्वास्थ्य प्रबद्र्धन शाखाका राकेश चौधरीले जानकारी दिए । स्वास्थ्य शाखा र सम्बन्धित स्वास्थ्य चौकीका स्वास्थ्यकर्मीद्वारा शिविरमा आउनुभएका स्थानीय नागरिकहरूको स्वास्थ्य जाँच गरिएको जनस्वास्थ्य प्रबद्र्धन शाखाले जनाएको छ ।
अस्वस्थ जीवनशैली र खानपान मुख्य कारक मानिने नसर्ने रोगबाट पीडितहरूको बढ्दो संख्या हेर्दा बर्सेनि अवस्था भयावह बन्दै गएको देखिन्छ । क्यान्सर,उच्च रक्तचाप,मुटु रोग,मधुमेह लगायतका रोगहरूको कारण नेपालमा बर्सेनि ७१ प्रतिशत मानिसको मृत्यु हुने गरेको चिकित्सकहरु बताउछन ।
सुर्तीजन्य पदार्थ,मादक पदार्थ तथा लागु औषधको सेवन,अस्वस्थ खानपान मुटु रोग,मधुमेह,उच्च रक्तचापको मुख्य कारण रहेका छन् । नसर्ने रोगको कारण पछिल्लो समय युवाहरू बढी जोखिम देखिएको अध्ययनले देखाएको छ ।
नेपालीको औसत आयु ७२ वर्ष मानिन्छ । नेपालमा कुल वार्षिक मृत्युदरको २२ प्रतिशत मृत्यु अल्पायुमा मृत्यु हुने गरेको चिकित्सकहरु बताउँछन् ।
सरकारले अल्पायुमा हुने २२ प्रतिशत मृत्युलाई सन् २०३० सम्म ४ देखि ५ प्रतिशतमा झार्ने लक्ष्य राखेको छ । नेपालका ४७ लाख नागरिक उच्च रक्तचापबाट प्रभावित भएको जसमा ४ लाखले औषधी सेवन गरेको र २ लाखको मात्रै उच्च रक्तचाप नियन्त्रणमा रहेको सरकारी एक अध्ययनले देखाएको छ ।
