बारा प्रहरीले हुण्डी कारोबारमा संलग्न दुई जनालाई १० लाख २० हजारको अवैध रकमसहित पक्राउ गरेको छ ।
प्रहरीले श्रावण ०६ गते विशेष सूचनाको आधारमा उनीहरुलाई पक्राउ गरिएको हो । ईलाका प्रहरी कार्यालय छतवाबाट प्रहरी वरिष्ठ नायब निरीक्षक सन्तोष के.सि.को कमाण्डमा खटिएको प्रहरी टोलिले उनीहरुलाई पक्राउ गरेको हो ।
टोलिले जिल्लाको बिश्रामपुर गाँउपालिका वडा नम्बर १ घोडासहन नाका स्थितमा ना ३६ प ४५६३ नम्बरको मोटरसाईकलमा भारतबाट नेपालमा श्रोत नखुलेको रकम ओसार पसार गर्ने क्रममा दुई जनालाई पक्राउ गरिएको जिल्ला प्रहरी कार्यालय बाराले जनाएको छ ।
पक्राउ पर्नेमा मोटरसाइकल चालक बाराको फेटा गाँउपालिका वडा नंम्बर ६ पुरैनिया बस्ने अन्दाजी ४१ वर्षीय सैदुल्ला मियाँ ठकुराई र मोटरसाइकलको पछाडी सवार सोहि ठाउँमा बस्ने अन्दाजी २२ वर्षीय बागर अंसारी रहेको प्रहरीले जनाएको छ ।
प्रहरीले उनीहरूको साथबाट लुकाई छिपाई ल्याएको विभिन्न दरको नेपाली १० लाख २० हजार रुपैयाँ बरामद गरेको छ ।
उक्त दुवै जनालाई पक्राउ गरी हुण्डी सम्बन्धी कसुरमा मुद्दा दर्ता गरी जिल्ला अदालत बारा,कलैयाबाट ७ सात दिनको म्याद थप गरी थप अनुसन्धान कार्य भई रहेको बाराका प्रवक्ता एवम् प्रहरी नायब उपरीक्षक दधिराम न्यौपानेले जानकारी दिएका छन् ।
