बारा । बाराको पचरौता नगरपालिकाका नगर प्रमुख जलन्धर सिंह जैसवारले कानुनी व्यवस्था विपरीत विद्यालय कर्मचारीलाई काज फिर्ता नगरी नगरपालिकामै जिम्मेवारी दिएको आरोप लागेको छ।
शिक्षा विकास तथा समन्वय इकाई, बाराले अख्तियार दुरुपयोग अनुसन्धान आयोग, टंगालमा परेको उजुरी तथा शिक्षा, विज्ञान तथा प्रविधि मन्त्रालय र शिक्षा तथा मानव स्रोत विकास केन्द्रबाट प्राप्त पत्रका आधारमा पाँच जना कर्मचारीलाई विद्यालयमा काज फिर्ता गर्न निर्देशन दिएको थियो।
इकाईले २०८१ असार ६ गते गरेको निर्णयअनुसार सम्बन्धित पाँच जनालाई तीन दिनभित्र आ–आफ्नो विद्यालयमा काज फिर्ता गर्न अल्टिमेटम दिएको थियो। उक्त निर्देशनअनुसार शिक्षा संयोजकका जिम्मेवारीमा रहेका पंडित त्रिपाठीलाई पचरौता नगरपालिकाले श्री नेपाल राष्ट्रिय प्राथमिक विद्यालय इनर्वा पकडियामा काज फिर्ता गरेको बताइएको छ।
तर, सोही प्रक्रियामा परेका श्री नेपाल राष्ट्रिय माध्यमिक विद्यालय, बेनौलीका विद्यालय कर्मचारी (लेखापाल) मुकेश कुमार सिंहलाई भने हालसम्म काज फिर्ता नगरिएको आरोप छ। सिंहलाई नगरपालिकाले शिक्षा सह–संयोजकको जिम्मेवारीमा राखेको छ।
सिंह नगर प्रमुख जैसवारका नातामा पर्ने व्यक्ति रहेको दाबी गर्दै स्थानीय जानकारहरूले एउटै विषयमा फरक–फरक व्यवहार गरिएको भन्दै प्रश्न उठाएका छन्। उनीहरूले कानुनी निर्देशन कार्यान्वयन नगरी नातागोताका व्यक्तिलाई नगरपालिकाको जिम्मेवार पदमा राख्नु प्रशासनिक निष्पक्षता, पारदर्शिता र सुशासनको मर्मविपरीत भएको बताएका छन्।
यस विषयमा पचरौता नगरपालिकाका निमित्त प्रमुख प्रशासकीय अधिकृत वसन्त राज जोशीसँग प्रतिक्रिया लिन मोबाइल नम्बर ९८४८७३२३९९ मा सम्पर्क गर्दा उनी सम्पर्कमा आउन चाहेनन्।
यता शिक्षा विकास तथा समन्वय इकाई, बाराका निमित्त इकाई प्रमुख अशोक कुमार रौनियारले कानुनभन्दा माथि कोही पनि हुन नसक्ने भन्दै सम्बन्धित कर्मचारीलाई काज फिर्ता गर्नुपर्ने बताए।
उक्त पत्र पठाइएको लामो समय बितिसक्दा पनि कार्यान्वयन नभएको विषयमा रौनियारले आफू हाल कार्यालयबाहिर रहेको भन्दै कार्यालयमा फर्किएपछि आवश्यक जानकारी लिने बताए।
