बारा प्रहरीले दुई लाख नौ हजार तीन सय रुपैयाँ बराबरको अबैध सामान बरामद गरेको छ ।
जिल्ला प्रहरी कार्यालय बाराका मातहत तथा प्रहरी ईकाइ कार्यालयहरूबाट खटिएका प्रहरी टोलीले जिल्लाको विभिन्न स्थानबाट अबैध भन्सार छलीका कुनै किसमको बिल भरपाई नभएको सो सामान बरामद गरेको हो ।
ईलाका प्रहरी कार्यालय सिमराबाट खटिएको प्रहरी टोलिले जीतपरसिमरा उप–महानगरपालिका वडा नम्बर २ सूर्य नेपाल अगाडी बीरगंजबाट जनकपुर तर्फ जाँदै गरेको ना ५ ख २७४९ नम्बरको यात्रुबाहक बसमा लोड रहेको साडी–४९ पिस,कुर्ता सुरुवाल– ९ पिस,कपडा –२१ थान बरामद गरेको प्रहरीले जनाएको छ ।
प्रहरीका अनुसार कपडाहरुको अन्दाजी मूल्य एक लाख ७० हजार तीन सय रुपैयाँ बराबरको छ ।
त्यस्तै जिल्ला प्रहरी कार्यालय बाराबाट खटिएको प्रहरी टोलिले बिश्रामपुर गाउँपालिका वडा नम्बर ५ ईटियाही स्थितमा भारतबाट नेपाल तर्फ ल्याउदै गरेको अन्दाजी मुल्य रू.२७ हजार रुपैयाँ बराबरको हाफ पाईन्ट १ सय ८२ पिस बरामद गरेको छ ।
त्यसैगरी प्रहरी चौकी पथलैयाबाट खटिएको प्रहरी टोलिले जीतपुरसिमरा उप–महानगरपालिका वडा नम्बर १ पथलैया चोक स्थितमा वीरगंजबाट काठमाण्डौं तर्फ जाँदै गरेको यात्रु बाहक बसमा लोड रहेको अन्दाजी मुल्य रु. १२ हजार रुपैयाँ बराबरको प्याज बरामद गरेको छ ।
उक्त अवैध सामानहरुलाई नियन्त्रणमा लिई आवश्यक कानूनी प्रकृया अगाढि बढाईएको प्रवक्ता एवम् प्रहरी नायब उपरीक्षक प्रकाश सापकोटाले मंगलवार एक प्रेस विज्ञप्ति जारी गर्दै यस बारे जानकारी दिएका हुन् ।
