जीतपुरसिमरा उपमहानगरपालिका वडा नं.१४ रजघट्टामा रहेको भूमिहीन दलित,भूमिहीन सुकुम्वासी तथा अव्यवस्थित बसोबासीहरुलाई निस्सा(जग्गा प्राप्त गर्ने प्रमाणपत्र) वितरण कार्य सुरु भएको छ ।
एक कार्यक्रमकाबीच मंगलबार पूर्व मन्त्री पुरुषोत्तम पौडेल, प्रदेश सभा सदस्य मञ्जु थापा,जीतपुरसिमरा उपमहानगरपालिकाको नगर प्रमुख राजन पौडेल र वडा अध्यक्ष चयन गुरुङ्गले संयुक्त रुपमा भूमिहीन दलित तथा सुकुम्वासीलाई निस्सा वितरण कार्यको सुरुवात गरेका हुन् ।
वडा नं.१४ मा पाँच सय ५० जना भूमिहीन दलित, भूमिहीन सुकुम्वासी तथा अव्यवस्थित बसोबासीहरु रहेका छन् । जीतपुरसिमरा उपमहानगरपालिका वडा नं.१,२,१५,१७ र २२ मा भूमिहीन दलित, भूमिहीन सुकुम्वासी तथा अव्यवस्थित बसोबासीको कार्य अगाडि बढाईएको जीतपुरसिमरा उपमहानगरपालिकाले जनाएको छ ।
वडा नं.१६ र १८ मा निस्सा वितरण गरिसकिएको छ भने १४ मा वितरण भईरहेको नगर प्रमुख पौडेलले जानकारी दिए । नगर प्रमुख पौडेलले वडा सहजीकरण समितिबाट नै विवाद निरुपण गरेर नगरमा पठाएको खण्डमा काममा कुनै विवाद नभई जग्गा प्राप्तिको प्रक्रिया द्रुत गतिमा अघि बढ्ने जानकारी दिए ।
उनले वडा सहजीकरण समितिमा विवाद भएको खण्डमा सहज रुपमा समाधान गर्न सक्ने हेतुले नगर स्तरीय सहजीकरण समितिमा राष्ट्रिय पार्टीको मान्यता प्राप्त पार्टीका नगर अध्यक्षहरुलाई नै राखेको बताए । त्यस्तै वडा अध्यक्ष गुरुङ्गले तिहार अगाडि सम्ममा निस्सा बितरणको कार्यलाई सकाईसक्ने लक्ष्य रहेको जानकारी दिनुभयो ।
जीतपुरसिमरा उपमहानगरपालिकाले छिटै नै जग्गाको लालपुर्जा वितरणका लागि प्रक्रिया सुरु हुने बताइएको छ । अब नापी कार्यालयबाट प्राविधिकहरु फिल्डमा गएर नाँपजाँच गर्ने र जग्गा वितरण गर्नका लागि प्रक्रिया अघि बढ्ने छ ।
सो क्रममा उनीहरु बसेको ठाउँमा जग्गा खोजी गरिने र त्यहाँ नपाएको खण्डमा सार्वजनिक जग्गाको खोजी गरिने कार्य हुने जनाईएको छ ।
