राम मण्डल
वीरगञ्ज
पर्सा जिल्लामा रहेका १४ पालिका मध्ये सात वटा पालिकाहरुले मनोमानी रुपमा ईन्धनमा पैसा खर्च गरेका छन ।
सात वटा पालिकाहरुले आर्थिक बर्ष २०७६÷७७ मा ईन्धनमा मात्रै एक करोड ८० लाख ६ सय ७८ रुपैया खर्च गरेका छन । जिल्लाका बिभिन्न सात वटा पालिकाहरुले एक बर्षमै डेढ करोड भन्दा बढीको ईन्धन खर्च गरेका छन ।
महालेखा परिक्षकको कार्यालयले जारी गरेको बार्षिक प्रतिबेदनका अनुसार आर्थिक बर्ष ०७६÷७७ मा जिल्लाको पोखरिया नगरपालिका,कालिकामाई गाउँपालिका,ठोरी,धोबिनी,सखुवा प्रसौनी,पटेर्वा सुगौली र जगरनाथपुर गाउँपालिका गरि सात वटा पालिकाहरुले एक करोड ८० लाख ६ सय ७८ रुपैया ईन्धनमा खर्च गरेका हुन ।
सबै भन्दा बढी जगरनापुर गाउँपालिकाले एक बर्षमै ३१ लाख ७६ हजार ३० रुपैयाको ईन्धन खरिद गरेको महालेखाले जारी गरेको प्रतिबेदनमा उल्लेख रहेको छ । यसैगरि सखुवा प्रसौनी गाउँपालिकाले २५ लाख १९ हजार ६१, धोबिनीले २४ लाख ९४ हजार एक सय ८६, कालिकामाईले २३ लाख ९५ हजार ३ सय ८४,ठोरीले २२ लाख ७६ हजार ८ सय ६८, पोखरिया नगरपालिकाले १७ लाख ८५ हजार ४९ र पटेर्वा सुगौली गाउँपालिकाले एक बर्षमै १२ लाख ३ हजार १ सय रुपैया ईन्धनमा खर्च गरेका छन ।
यता ईन्धन खर्च गर्दा गाडीको लगबुक राख्नुपर्ने र कर्मचारीलाई मोटरसाईकलमा पेट्रोल खर्च दिदा मासिक रुपमा सिमा तोकी प्रदान गर्नुपर्ने हुन्छ । तर पोखरिया नगरपालिकाले केही ईन्धन कुपनमा गाडी नम्बर नखुलेको र मोटरसाईकलमा १० देखि २५ लिटरसम्म ईन्धन उपल्बध गराएको देखिएको महालेखाले जनाएको छ ।
