बाराको जीतपुरसिमरा उपमहानगरपालिकाले पालिका भरीका सहकारीको क्षमता अभिवृद्धिका लागि दुईदिने क्षमता अभिवृद्धि तालिम शनिबार सम्पन्न भएको छ ।
यस अघि सिमरास्थित होटल क्लासिक प्लाजामा आयोजित दुईदिने तालिमको नगरप्रमुख राजन पौडेलले शुक्रबार उद्घाटन गरेका थिए ।
नगरप्रमुख पौडेलले संख्यात्मकमा नभै सहकारीको गुणत्मक वृद्धिमा नगरले ध्यान दिएको बताए । अन्यत्र सहकारीहरुमा देखिएका समस्या जीतपुरसिमराका जनताले भोग्न नपर्नेगरी कानुनी रुपमा सबल बन्न तालिममा सहभागिहरुलाई उनले आग्रह गरेका थिए ।
कानुन परिपालनमा सहकारी संचालक र तीनका सदस्य चुक्दा समस्या भैरहेको उनले सुनाए । सहकारीहरुले निर्देशित कानुनलाई ब्यवस्था गर्न नहुने उनको भनाई थियो ।
जीतपुरसिमरा उपमहानगरपालिकामा १०३ वटा सहकारी रहेको छ । यहाँ करिब ७५ वटा संस्था सक्रीय रहेका छन् । तीनै मध्येका ६५ वटा सहकारी कर्मचारी र संचालक गरी एकसय ५० जना प्रतिनिधिहरुको तालिममा सहभागिता रहेको पालिकाका सहकारी शाखा प्रमुख सुधन चौधरीले जानकारी दिए ।
तालिमका सहभागिलाई साना किसान विकास लघुवित्त वित्तीय संस्थाका नायव कार्यकारी प्रमुख झलेन्द्र भट्टराईले सहजीकरण गरे ।
