बारा प्रहरीले दुई सय ३० किलो लागू औषध गाँजा सहित एक युवकलाई पक्राउ गरेको छ ।
जिल्ला प्रहरी कार्यालय बाराले बिहीबार पत्रकार सम्मेलन गरी पक्राउ परेकालाई सार्वजनिक गरेको छ ।
पक्राउ पर्नेमा रौतहटको फतुवा बिजयपुर नगरपालिका वडा नम्बर ४ टेंग्राहा बस्ने अन्दाजी २३ वर्षीय चन्दन पासवान रहेको प्रहरीले जनाएको छ ।
उनको साथबाट प्रहरीले १५ पोकामा रहेको लागु औषध गाँजा दुई सय ३० किलो गाँजा बरामद गरेको हो ।
विशेष सूचनाको आधारमा बुधबार राति अन्दाजी १ः३० बजेको समयमा ईलाका प्रहरी कार्यालय सिम्रौनगढ बाराबाट प्रहरी निरीक्षक नविन राईको कमाण्डमा खटिएको प्रहरी टोलिले पासवानलाई पक्राउ गरेको हो ।
जिल्लाको पचरौता नगरपालिका वडा नम्बर ४ ईनर्वामा ४ वटा जुटको बोरा लिई गाँजा राख्दै गरेको अवस्थामा प्रहरीलाई देखि भाग्न खोज्दा प्रहरीले एक राउण्ड गोली हवाई फायर गरी उक्त युवकलाई नियन्त्रणमा लिएको हो ।
सोही स्थानको कल्भर्र्ट मुनि प्लाष्टिकमा बेरी लुकाई छिपाई राखेको लागू औषध गाँजा प्रहरीले बरामद गरेको हो ।
लागु औषध सहित पासवानलाई नियन्त्रणमा लिई कानूनी प्रकृया अगाडि बढाईएको बाराका प्रहरी प्रमुख एवम् प्रहरी उपरीक्षक महेन्द्र खड्काले बताए ।
साथै विभिन्न मितिमा पक्राउ गरेको लागू औषध तथा सूर्ति प्रहरीले नष्ट गरेको छ ।विशेष सूचनाको आधारमा जिल्ला प्रहरी कार्यालय बाराका मातहत समेत बाट खटिएको प्रहरी टोलीले विभिन्न मितिमा बरामद गरेको लागू औषध तथा सूर्ति नष्ट गरेको हो ।
जिल्ला प्रहरी कार्यालय बाराको परिसरभित्र सञ्चारकर्मीहरू लगायतको उपस्थितिमा नष्ट गरिएको हो । कस्तुरी २ सय ३९ बोतल,कोरेक्स २ सय बोतल र सूर्ति ७ मुठा प्रहरीले नष्ट गरेको छ ।
