रौतहट । वर्षाको समयमा पानी निकासको समस्याले हैरानी खेप्दै आएका मौलापुरवासीलाई लक्षित गर्दै मौलापुर नगरपालिकाले ढल व्यवस्थापनलाई प्राथमिकतामा राखेर पूर्वाधार निर्माण अघि बढाएको छ। नगर क्षेत्रका विभिन्न स्थानमा करोडौँ रुपैयाँ लगानीमा ढल निर्माण भइरहेको छ भने केही आयोजना सम्पन्न भइसकेका छन्।
विशेषगरी मौलापुरको ऐतिहासिक महादेव मन्दिर रहेको पतौरा गाउँ तथा आसपासको बजार क्षेत्रमा वर्षाको पानी जम्ने समस्या हटाउने उद्देश्यले ढल निर्माणलाई तीव्रता दिइएको नगरपालिकाले जनाएको छ। निर्माणाधीन संरचनाको नगर प्रमुख रिनाकुमारी साहले स्थलगत निरीक्षण गर्दै कामको प्रगति र गुणस्तरबारे जानकारी लिएकी छन्।
नगरपालिकाका अनुसार पानीको सहज निकासका लागि व्यवस्थित ढल सञ्जाल निर्माण भएपछि पतौरा र बजार क्षेत्रमा वर्षायाममा हुने डुबानको समस्या घट्ने अपेक्षा गरिएको छ। लामो समयदेखि निकासको अभावमा समस्या झेल्दै आएका स्थानीयका लागि आयोजना महत्वपूर्ण हुने नगरपालिकाको दाबी छ।
ढल निर्माणसँगै मौलापुरले स्थानीय तहका अन्य सेवा तथा पूर्वाधारका क्षेत्रमा अघि सारेका कार्यक्रमका कारण पनि विभिन्न पालिकाको ध्यान तानेको जनाएको छ। शून्य करको नीति, निःशुल्क पानी तथा विद्युत्, छोरीको विवाहमा सहयोग, शिक्षा–स्वास्थ्यका कार्यक्रम र दलित बस्ती निर्माणलगायतका कामबारे जानकारी लिन विभिन्न पालिकाका जनप्रतिनिधि तथा कर्मचारीले अध्ययन भ्रमण गर्दै आएको नगरपालिकाको भनाइ छ।
स्थानीय सुरेन्द्र कुशवाहाका अनुसार व्यवस्थित ढल निर्माणले नगर क्षेत्रको सरसफाइ र पानी निकास दुवैमा सुधार ल्याउने अपेक्षा गरिएको छ। उनका अनुसार मौलापुरमा सञ्चालन भएका विभिन्न योजनाबारे बाहिरी पालिकाका प्रतिनिधिले चासो राख्दै अनुभव लिन आउने गरेका छन्।
नगर प्रमुख साहले ढल निर्माणलाई अन्य विकास आयोजनाजस्तै प्रभावकारी र व्यवस्थित बनाउनुपर्नेमा जोड दिएकी छन्। उनका अनुसार पूर्वाधार निर्माणको उद्देश्य तत्कालको समस्या समाधानमा मात्र सीमित नभई आगामी वर्षमा समेत उपयोगी हुने दीर्घकालीन संरचना तयार गर्नु हो।
तराई–मधेसका धेरै बस्तीमा वर्षात्का बेला पानी निकासको कमजोर व्यवस्थाका कारण डुबान, हिलाम्मे सडक र आवागमनमा समस्या देखिने गरेको छ। यही अवस्थालाई ध्यानमा राख्दै मौलापुरले ढल तथा पानी निकासका संरचनालाई विस्तार गर्दै नगर क्षेत्रलाई व्यवस्थित बनाउने योजना अघि सारेको हो।
